Weppers tiisdei 10-5-2022

Heerenveense Boys 1 – SDS 1 5-1

Fannejûn spile de nûmer 5, SDS 1, om 19.30 oere yn it Hearrefean tsjin nûmer 3, Heerenveense Boys 1.
SDS wie de earste helte seker net minder mar ien wrâldgoal en in lyts foutsje soargen foar in 2-0 rêststân foar de Feansters. Yn de twadde helte like op in gegeven momint eltse kans in goal te wêzen. Yn in lyts tiidbestek waard it fan 2-0, samar 5-1. Peter Hoogerwerf skoorde foar SDS 1. SDS wie oan de bal seker net minder as Heerenveense Boys. Net gek fuotballe dus tsjin in tsjinstanner dy ’t him sa oan de lêste strie fêsthâld om noch kampioen te wurden.
Dit wie de seleksje fan SDS:
1 Jaap©️
2 Luuk
3 Erik
4 Gerwin
5 Jelte-Pieter
6 Matthijs
7 Steven
8 Remco
9 Pieter
10 Teun
11 Lourens
12 Douwe Jan
13 Gerbrand
14 Peter
15 Stan
16 Hendrik

Hoe sit it ek alwer?

Yn it Frysk Deiblêd kinne jim eksakt lêze hoe ’t it sit mei de promoasje-degradaasjeregelingen en de neikompetysjes yn it amateurfuotbal. Sjoch hjir.

Roel de Wit

Ofrûne sneon wie de trainer fan SDS 1 yn 1979-1980 net op de reuny. Der wie net bekend wêr as Roel de Wit wenne en as hy überhaupt noch libbe. Ynmiddels is bekend dat Roel de Wit yn Frjentsjer wennet en hat ynmiddels kontakt opnommen.

JO12-1

Justerjûn hat de JO12-1 yn Nijland fuotballe tsjin Nijland JO12-1. Nei in 3-0 efterstân wist SDS JO12-1 dochs noch werom te kommen oant 3-3. Dit betsjut dat sy sneon tsjin GAVC kampioen wurde kinne.

JO19-1

SDS JO19-1 spilet moarntejûn om 19.30 oere út yn Snits tsjin LSC JO19-2.

Derbysneon

Kommende sneon fuotballet SDS 1 de derby tsjin Scharnegoutum 1. Wy meitsje der lyk mar wer in feessie fan mei nei de tiid DJ Jan Bouke.

Penaltystippen net brûke

It keunstgersfjild leit no 6 jier te plak en is ûnderhevich oan slitaasje. Yn 2019 is ien penaltystip alris ferfongen, mar hy is no alwer stikken en oan ferfanging ta. Graach de penaltystippen net brûke mei it trainen sadat wy nei dit seizoen wer nije penaltystippen oanlizze litte kinne.

7×7-feessie

Kommende freed spilet SDS Vr.2(7-tsjin7) yn Wytmarsum foar de lêste kear dit seizoen tsjin Makkum, Mulier en Blauw-Rood ’20. Dit wurdt grut feest, want neist de froulju-7-tsjin-7 komme ek de manlju 35+ yn Wytmarsum fuotbaljen. Nei it fuotbaljen sil Sipke de Boer de boel op stelten sette.

SDS-League

Wy hoopje moarn mei de nijste stân fan de SDS-League te kommen. Dit is de lêste stân foar de einstân nije wike.