SDS-klussers Robin & Jesse binne los foar de WEK

It WEK hat ús in skoftke lyn frege as wy as SDS meidwaan wolle oan de aksje Energysúnich Wommels.
De aksje is opset troch de energiecoaches fan de WEK yn gearwurking mei Doarpsbelang Wommels en Elkien.
Mear ynformaasje oer de aksje is te finen op de site fan de WEK, wekwommels.nl.

Op it foarwurk dat dien is binne der sa’n 120 oanfragen  fan ynwenners fan Wommels kommen foar it oanbringen fan lytse energybesparjende maatregels.
De energiecoaches fan de WEK soargje foar in ynvintarisaasje fan it nedige materiaal en foar de bestelling.
Dêrnei komme de frijwilligers yn byld, dy’t yn twatallen de materialen lykas tochtstrips, radiatorfoly en brievebusboarstels oanbringe sille.
Per adres smyt dat € 50 ,-op foar de ferieniging.
Dat like ús wol wat!
Ommers net elk lid of âlder fan ús feriening kin SDS stypje troch bygelyks training te jaan, mar is miskien wol handich mei oare dingen en it kin op eigen tiden.

Robin van der Weg en Jesse van der Weide hawwe dizze wurkwanten foar SDS oppakt en binne oan de slach gien.
Ofrûne sneontemoarn hawwe sy de earste energybesparjende kluskes dien.
Sa kamen sy û.o. by de familie Ruiter yn Wommels.
Ald-molkboer Ruiter kaam yn it ferline wol by SDS en de soanen Albert en Henk hawwe jierren by SDS balle.
Nei in hearlijk bakje kofje mei SDS-ferhalen oer de tafel fan doe en no hawwe Jesse en Robin radiatorfoly oanbrocht om sa wat stookkosten te besparjen.

Soesto ek foar SDS kluskes foar it WEK dwaan wolle lit it ús dan witte fia info@vv-sds.nl of sjit ien fan it SDS-bestjoer oan.

Sa helpe je SDS, it WEK, in Wommelser en it miljeu om mei te helpen te ferduorsumjen.